《頂》

頂…咁耐無寫，真係唔知點寫。
返工搏老命寫，放工後無力寫，要拍拖更加無時間寫。

所以，要「頂」。

但係，此「頂」不同彼「頂」。此「頂」者，源於中國大陸網路潮語，有支持、加油之意。
咁，點解要「頂」?

就係你你你同你你同你囉。

我都唔明，每一次更新，幾日加埋，都叫有二百零人睇呀。
點解都無人留個言話睇過嘅呢?

我知，二百零人，相對如此龐大的網路世界，何止九牛一毛，簡直細如微塵，或者只比納米大些少。

但係咁喎，我招呼得你，都叫做識我呀，咁你都講聲我知你去過我屋企探過我呀。
睇完你就走，咁同你躡手躡腳，潛入我間屋，裝完我沖涼，眼球上強姦(或雞姦)完我，然後無聲無息咁走，事後嘅溫存都唔留。
好缺德啫。

你畀我知道你到此一遊，等我知道原來我重有乜嘢朋友。
起碼畀我知道有邊個平時無乜嘢講但係仍然會咁關心我。

亦好坦白，或者我唔會特別有反應，不過其實滋味在心頭。
無需用言語表達的情感，才是最能動人的情感。

其實，我都係想有個「知」字啫。

用多一句網路潮句作結：「你們的回覆是我發帖的動力。」

然後，通常都係：
「頂…」

________________________________________________________________________________

按：

原來，用「咁囉嘅呢嘛」係寫得快好多，一程巴士已經寫得晒。
但係，我一直都好抗拒要將中文寫得太口語化。

太接近口語，就只會流於說話，沒有了中文應該有的立體空間。

所以，只此一次，下不為例。